یاہو کے 50 کروڑ صارفین کی معلومات چوری

23 September 2016

سان فرانسسکو: انٹرنیٹ کمپنی یاہو نے تصدیق کی ہے کہ ہیکرز نے اس کے 50 کروڑ صارفین کے اکاؤنٹس کی اہم معلومات چوری کر لی ہیں۔

خبر رساں ادارے ایسوسی ایٹڈ پریس (اے پی) کے مطابق ڈیٹا کی چوری 2014 میں ہوئی تھی، جس میں ذاتی معلومات کے ساتھ ساتھ سیکیورٹی کے حوالے سے بھی سوال جواب چوری ہوئے، تاہم ہیکرز کو صارفین کے بینک اکاؤنٹس اور کریڈٹ کارڈ کے بارے میں کچھ معلومات حاصل نہ ہوسکیں۔

واضح رہے کہ جولائی میں یاہو کو امریکی ٹیلی کام کمپنی ویریزون نے 4 ارب 80 کروڑ میں خرید لیا تھا۔

فی الوقت اس حوالے سے کوئی معلومات نہیں ملیں کہ حالیہ چوری کا اس کی فروخت اور اہمیت پر کیا اثر پڑ سکتا ہے۔

یاہو پر ممکنہ طور پر بڑے حملے کی خبریں گذشتہ ماہ سامنے آنا شروع ہوئی تھیں جبکہ ’پیس‘ نامی ہیکر نے بظاہر 20 کروڑ اکاؤنٹس کی معلومات فروخت کرنے کی کوشش کی تھی۔

کمپنی کی جانب سے صارفین کو یہ بھی تجویز دی گئی ہے کہ اگر انہوں نے سال 2014 سے اپنے اکاؤنٹس کے پاس ورڈ تبدیل نہیں کیے تو وہ انھیں تبدیل کر لیں۔

Source. Dawn News

Leave a Reply

Be the First to Comment!


wpDiscuz